Te whakahoutanga o Te Kawa o te Ako o Whakapūmau

He whānau hou! 

He tīma whakahaere hou!

He huarahi hou! 
31.10.2018

I ngā tau e rua kua hori, kua uia te whānau, kua uia ngā ākonga, kua uia ngā pouakao anō hoki te hanga o Te Raukura o Whakapūmau me Ngā Uara o te kura.

Kua mea kaha mai ngā tāngata whai pānga ki te kura, kua tae te wā kia whakahou, kia panoni i ngēnei āhuatanga.

Nō reira, kua whakatauria mai ko ngēnei ngā Uara hou ka arahina tātou hei ngā tau e haere mai ana!

Kua whakakotahi mai mātou i ngā uara o te Manaakitanga, te Whaikoha me te Whakapono, arā, ko te Aroha tēnā e noho ana hei wharau mō ngā Uara e whā.

Ka mau tonu tātou ki te Rangatiratanga i runga anō i tō tātou nei Tino Rangatiratanga hei kaitiaki o tēnei whenua o Aotearoa, hei mana whenua anō hoki.

Kua whakaaetia mai e te whānau ko te Hauora o te tangata tētehi hanga me matua whakaū tātou. Kua rangahaua e mātou ngā kupu e tika ana mō tēnei uara, ā, kua whakatauria ko te Toiora te kupu e tika ana. Toitū te oranga! 

Kua kī mai te whānau me whakatipu tātou i ngā tamariki pākiki i ngā tamariki auaha me ngā tamariki kaha ki te tūhura i te ao whānui!

Te Raukura o Whakapūmau

Kua hoki anō ki te tūāpapa o te kaupapa arā ki Te Aho Matua. Kei reira te oranga o te kura! 

Kia mau ki tō Whakapūmautanga! 

Te Aho Matua - Te Ira Tangata, Te Reo, Ngā Iwi, Te Ao, Āhuatanga Ako, Te Tino Uaratanga

Paerewa #1 #2, #3, #4, #5, #6

Hoki atu ki tō maunga kia purea koe e ngā hau o Tāwhirimātea

He oranga ngākau he pikinga wairua

I te mutunga wiki o 5 o Whiringa a nuku i tae atu ahau ki tētehi o ōku haukāinga ki te whai i ngā tapuae o ōku nei tupuna! 

I whakaora anō a Nanny Josephine Anderson i te pātere Hauturu, nā tōna matua kēkē i tito i tērā rautau. Ara noa atu ngā tūtohu whenua i whakaingoatia mai i te pātere! 

I hui tahi te whānau o Tokikapu marae, i whakaritea te āhuatanga o te haere kātahi ka patua te rori kia tae atu ki ngērā wāhi i whakaingoatia.

 Ko Kauwhawhe tēnei taha o te maunga, ko Ōwhawhe kei muri tonu i tēnei o ngā maunga.

Kei te titiro whakawaho a Nanny Josephine ki Pareāniwaniwa. Ki reira a Tānetinorau e takoto ana e moe roa ana. Kei te taha māui o Pareāniwaniwa ko Pohatuiri.

 He toka maumaharatanga ki ngā tamariki o Tānetinorau. Ko Okewhare Pakira tōku tupuna.

Nā Okewhare tēnei whare.

 He wā kai ki Natural Bridge.

  Te tū whakamutunga!

 Ko Waikaukau te ingoa o te wāhi nei. Koia te ingoa o te pāmu o Kamoe Tāne rāua ko Tame Paki.

 Te Whare Punga ki Pohatuiri (Parahamuti)

 Ko Mangatoatoa te marae, ko Kakepuku te maunga, ko Pūniu te awa, ko Ngāti Paretekawa te hapū!