He whakangungu he akoranga he oranga ngakau!

Whakangungu 1

Hangarau Matihiko ki Tātai Aho Rau

30.4.18 - 1.5.2018

Ko te kaupapa o te hui nei he whakarite mai i ngā tūāhua katoa e hāngai ana ki te kirimana o Kia Takatu! 

I hui tahi ngā kaimahi katoa o tēnei kaupapa mō ngā rangi e rua. 

Tuatahi rā i tū te mihimihi. He nui whakaharahara te wāhi o te Whanaungatanga i ngēnei momo kirimana.

I whai wāhi mātou ki te aro atu ki te CBAM hei ārahi i a tātou nei mahi whakahoahoa i te hōtaka mahi.

MATEs - Mutally Agreed Terms of Engagement - i waihanga ngātahi mātou i te tukanga mahi e pai ai ki a tātou.

I whai wāhi mātou ki ngā ngohe e hāngai ana ki te Whakaaro Rorohiko,

Whakangungu 2

Hangarau Matihiko Working Group

10.5.2018

I hui ngātahi tētehi rōpū i tautapaina i ngā kura hanga rerekē o te motu ki te matapaki i ngā tūāhua e hāngai ana ki te marau hou o Hangarau Matihiko. Nā Te Tahuhu te hui i karanga. He wā whakahoki kōrero ki a rātou e pā ana ki te rautaki whakawhanake i te whakamahinga o te hangarau matihiko i ngā kura puta noa i te motu.

Whakangungu 3

Te Reo o te Kura - Pūtaiao

11.5.2018

He wānanga whakapakari reo te mahi i karawhiua! Ko te mahi ia he wānanga i te kupu, i aro ki ngā rerenga hāngū, i ruku i ngā hanga o te reo tautohe, i whai wāhi hoki ki te reo matatini o te pūtaiao me te tūhura i ngā ngohe pūtaiao.

Tēnā koe e Anahera i tō mahi whakahaere hui whakangungu!

Te Aho Matua - Te Reo, Ngā Iwi, Te Ao, Āhuatanga Ako

Paerewa #2, #3, #4, #5, #6

Ngā Kaitiaki Aho Matua Hou!

Ngā Kaitiaki Aho Matua Hou!

I ngā whakamatuatanga ā-kura i te wāhanga tuatahi nei i tae atu māua ko Merita ki tētehi hui nui ki TKKM o Ruamata. Ko te kaupapa ia he ako i ngā kawenga o te Kaitiaki Aho Matua i ngā wā ka tae atu Te Tari Arotake ki ngā Kura Kaupapa Maori.

He tata ki te 12 o ngā tumuaki me ngā pouako i tae atu ki tēnei hui.

I matapaki tahi mātou i o mātou nei kawenga me ngā haepapa o ngā kaiarotake o ERO.

Hei te tau e tū mai nei ka tautoko māua i ngā KKM ki te whakatutuki pai i ngā mahi i te taha o ERO.

Te Aho Matua - Te Ira Tangata, Te Reo, Āhuatanga Ako, Te Tino Uaratanga

Paerewa #1, #2, #3, #4

Kāore he mutunga o te mahi ako

9.3.2018

I te Rāmere nei i tū tētehi rangi whakangungu reo mō ngā pouako katoa o te kura nei. I tae mai a Nichole Gully i Tātai Aho Rau (CORE Education Ltd) ki a mātou. Ko te kaupapa matua ko Te Reo Tautohe. I ruku whakarētō mātou i ngā āhuatanga o te reo, ngā rautaki whakaako me ngā aheinga matua o te mahi nei. 

13.3.2018

I tū tō mātou hui pouako ki ARA i te rangi nei. Ko te kaupapa matua o te hui he titiro atu ki ngā wāhi pūtaiao, ki ngā wāhi hangarau anō hoki o te whare rā.

He wā tūhura i ngā tūmomo taputapu i ngā katū rawa. Ko te tino whāinga he whai wheako ngā pouako kia kite atu i ngā momo mahi ka taea i te kura! 

Anei ngētehi whakaahua o ā tātou nei mahi.

Te Aho Matua - Te Reo, Ngā Iwi, Te Ao, Āhuatanga Ako

Paerewa #2, #4, #5, #6

Hui ā Tau mō Ngā Kura Kaupapa Māori Te Aho Matua o te motu

I te Rāpare te 22 o ngā rangi o Poutūterangi i timata ai te hui a tau mō tātou ngā kaimahi o Ngā Kura Kaupapa Māori Te Aho Matua o te motu.

I tū te hui ki te whenua haumako o Te Wairarapa. 

Nō Te Kura Kaupapa Māori o Te Wairarapa te mauri me te mana whakahaere o te hui motuhake.

I tae atu te tini me te mano ki te hui ki te matapaki ki te āta wetewete i ngā kaupapa nui taioreore o te wā.

I tae atu te wahine rongonui nei a Kōkā Anahera Bowen, he kaimahi o Te Kura Kaupapa Māori o Ruamata

I whakarongo pīkari mātou ki ngā kaupapa motuhake o te wā!

I kōrero mai a Pāpā Rawiri Wright ki a mātou e pā ana ki ngā aupikitanga me ngā auheketanga o te ao torangapū. Hei tāna  "Mā te ringa rau oti ai te mahi!"

I tae mai ngētehi kaikōrero o te Māori Women's Development Co. 

He rapu rongoā mō te NCEA te mahi! 

He mahi whakatau i te wairua te mahi!

Naia te mihi mutunga kore ki te haukāinga o Pāpāwai. He tohunga o te manaaki! 

I hoki hīkaka mai māua ko Kimi ki te kura! Me whawhai tonu tātou mō te mana motuhake o te mātauranga Māori! 

Kia mau ki tōku whatumanawa te hohonutanga o Te Aho Matua! 

Te Aho Matua - Te Ira Tangata, Te Tino Uaratanga
Paerewa #1, #3

Pakirehua o te tau 2018

He tau anō, he pakirehua anō, he akoranga hou anō māku!

I te tau 2017 i whakarewa te Education Council i ngā Parewa hou mō ngā pouako kia whai rēhitatanga. Kua tīmata hoki mātou ngā pouako ki te whakarite i tō mātou ake tirohanga ki ngēnei paerewa. Anei taku pakirehua mō te tau nei!

Ko te aronga matua o taku pakirehua he whai rautaki anō hei whakakipakipa hei whakatenatena i te hunga kei raro e putu ana mō te ako kia whakatere i tō rātou mahi akoako!

Kua tirohia ngā raraunga, kua arotūrukihia hoki e au ngā raraunga o ngā aromatawai kia kite atu i ngā matea motuhake o tēnei hunga.

I ngā wiki e tū mai nei ka whai mōhiotanga ahau, ka whai rautaki ahau hei whakatutuki i tēnei o oku hiahia! 

Ki te pakari te pouako, ka pakari hoki ngā ākonga! 

Whāia tonutia tēnei o ngā rangitaki kia kitea atu taku whanaketanga! 

Te Aho Matua - Āhuatanga Ako, Te Tino Uaratanga

Paerewa #1, #4